کونړ؛ په څوکۍ ولسوالۍ کې د ۲۴ لوبډلو په ګډون د والیبال ټورنمنټ پیل شو
د کونړ ولایت د بدني روزنې او ورزش امریت او والیبال فدراسیون په ګډه همکارۍ د دې ولایت په څوکۍ ولسوالۍ کې د حاجي عاشق الله والیبال کلب په کوربتوب د مشرقي زون ترڅنګ د مرکزي زون لوبډلو په ګډون د ۲۴ لوبډلو ترمنځ د والیبال ټورنمنټ پیل شو.
د دغو سیالیو د پیل په لوبه کې د څوکۍ ولسوالۍ لوبډلې د نرنګ ولسوالۍ لوبډلې ته د ۳-۰ میدانونو په توپیر ماتې ورکړه.
همداراز په دویمه لوبه کې د میدان ښار لوبډلې د ننګرهار اتحاد لوبډلې د ۲-۱ میدانونو په ماتې ورکړه.
د دغو سیالیو راتلونکې لوبه به د میدان ښار او څوکۍ ولسوالۍ لوبډلو ترمنځ ترسره شي.
دغه سیالۍ به پنځه ورځې دوام وکړي، چې پر دوام به یې هره ورځ څلور لوبې وشي.
