هلمند؛ ملگرو لوبډلې د فولاد جام په نوم د فوټسال سياليو اتلولي وگټله
د هلمند ولايت د بدني روزنې او ورزش امريت اړوند د فوټبال فدراسيون د استازولۍ د فوټسال کمېټې له لوري او د فولاد صنعتي شرکت په مالي ملاتړ د ياد ولايت په مرکز لښکرگاه ښار کې د ۱۶ لوبډلو ترمنځ د فولاد جام په نوم د فوټسال گروپي سيالۍ د ملگرو لوبډلې په اتلولۍ پای ته ورسېدې.
د يادو سیالیو په پايلوبه کې ملگرو لوبډلې خپلې سيالې برومند لوبډلې ته د ۱ پر صفر گول په توپير ماتې ورکړه او اتلولي يې په خپل نوم کړه.
د يادولو وړ ده، چې د دغو سياليو موخه ورزش ته د ځوانانو هڅول او سالم مصروفیت وو، چې درې اوونۍ يې دوام وکړ.
