هلمند؛ ناوې ولسوالۍ کې د اتو لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولايت د بدني روزنې او ورزش آمريت په همغږۍ، د ټېپ بال کرېکټ فدراسیون د استازولۍ له لوري د ناوې ولسوالۍ په لنډي ښاخ سيمه کې د اتو لوبډلو ترمنځ د آريانا اتلانو لوبډلې په اتلولۍ پای ته ورسېدې.
د يادو سياليو پايلوبه د آريانا اتلانو او اتحاد مرکزي لوبډلو ترمنځ وشوه، د لوبې پچه اتحاد مرکزي لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې خپلې سيالې لوبډلې ته د ۱۵۷ منډو هدف کېښود، په ځواب کې آريانا اتلانو لوبډلې ياد هدف لوبې په ۸م اور کې ترلاسه کړ او د لسو ویکټو په توپیر يې بريا خپله کړه.
دا سيالۍ ورزش ته د ځوانانو هڅولو په موخه وشوې، چې شاوخوا ۱۷ ورځې يې دوام وکړ.
