هلمند؛ د ورزش ادارې رهبري په شتون کې د المپیا بدن ښکلا او فټنس کلب پرانستل شو
د هلمند ولایت د بدني روزنې او ورزش آمریت په همکاري د دغه ولايت په مرکز لښکرګاه ښار کې د ٥ ميليونو افغانيو په ارزښت د ملي سوداګر شاه ولي اسحاقزي په مالي لګښت د المپیا په نوم کلب جوړ او د ورزش ادارې د رهبري په شتون کې پرانستل شو.
د پرانستي په دغو مراسمو کې د ورزش ادارې عمومي رئیس مولوي احمد الله وثیق، د ورزش ادارې فني او مسلکي معاون حافظ احمد جان ځدراڼ، د المپیکي چارو رئیس داد محمد پاینده اختري، د فوټبال فدراسیون رئیس محمد یوسف کارګر ، سوداګرو، مخکښو لوبغاړو او نورو ورزشکارانو ګډون کړی وو.
د یاد جمنازیوم د پرانیستې په مراسمو کې مولوي احمد الله وثیق وویل: د هلمند ولس بختور دی چې مشران او سوداګر يې د نورو برخو تر څنګ ورزش ته په لويه کچه توجه کړې او دا دی نن يې موږ د یو لوي کلب، چې په یو وخت کې د ٤٠٠ ورزشکارانو د ورزش کولو ظرفیت لري پرانسته کوو.
همدارنګه نوموړي زياته کړه، چې دا ډول کلبونه د ورزشکارانو په روزنه کې مهم رول لري او د ورزش اداره او د ا.ا.ا دولت مو تل تر شا په کلکه ولاړ او ملاتړ مو کوي.
