کابل؛ د بدن ښکلا او فټنيس نوولسم پړاو ملي ټاکنيزې سيالۍ پيل شوې

د المپيک بدني روزنې او ورزش عمومي رياست سره په همغږۍ د بدن ښکلا او فټنيس ملي فدراسیون له لوري د کابل په ګډون د هېواد له ۲۱ ولايتونو څخه د ۲۰۹ ورزشکارانو ترمنځ د بدن ښکلا او فټنيس ۱۹م پړاو ملي ټاکنيزې سيالۍ د هېواد ورزش ادارې په ۵۰۰ کسيز جمنازيوم کې پيل شوې.

دغه سيالۍ چې په دوو برخو، د بدن ښکلا او فټنيس کې له (۵۵ - ۹۵+) کيلو ګرامه بېلابېلو وزني کټګوريو او له( ۱۶۵ - ۱۸۵+) سانتې متر قد لرونکو ورزشکارانو ترمنځ پيل شوې، په پای کې به يې ۶۰ تنه په فټنيس او ۵۰ تنه د بدن ښکلا برخه کې د هېواد د بدن ښکلا او فټنيس ملي لوبډلې ته وټاکل شي.

د ويلو ده، چې يادې سيالۍ د هېواد ورزش ادارې د فني او مسلکي مرستيال حافظ احمد جان ځدراڼ، ورزشي مسوولینو، د ياد فدراسيون د رهبرۍ غړو، ورزشکارانو او ګڼ شمير مينوالو په شتون کې پيل شوې، چې دوه ورځې به دوام وکړي او پکې به ملي لوبډلې ته د غوره ورزشکارانو ترڅنګ مسټر افغانستان هم وپيژندل شي.