کابل؛ د افغانستان د پهلوانۍ لومړی پړاو غوره ليګ د قوشتېپې لوبډلې په اتلولۍ پای ته ورسېد
د المپیک، بدني روزنې او ورزش عمومي رياست اړوند د پهلوانۍ ملي فدراسيون له لوري د هېواد له بېلابېلو ولايتونو د ۱۰ لوبډلو ترمنځ د افغانستان د پهلوانۍ او غېږنيونې لومړی پړاو غوره ليګ سيالۍ، چې لس ورځې وړاندې د هېواد ورزش ادارې په ۲۵۰۰ کسیز جمنازيوم کې پيل شوې وې، د قوشتېپې لوبډلې په اتلولۍ پای ته ورسېدې.
د دغه ليګ د پای په مراسمو کې د المپیک، بدني روزنې او ورزش عمومي رئیس مولوي احمد الله وثیق، د ياد رياست فني او مسلکي مرستيال حافظ احمد جان ځدراڼ، ورزشي مشاور او د پهلوانۍ ملي فدراسيون رئيس قاري حيات الله رحماني، د بېلابېلو هېوادونو ډيپلوماتانو، د ا.ا.ا د بېلابېلو ادارو مسولينو، د ورزش ادارې مسولينو، ورزشکارانو او زرګونو مينوالو ګډون کړی وو.
د يادو سياليو د پای په مراسمو کې د هېواد ورزش ادارې عمومي رئيس مولوي احمدالله وثیق، د دغه ليګ په برياليتوب تراسروي، د پهلوانۍ ملي فدراسیون ټولو مسولينو ته مبارکي وويله او زياته يې کړه چې موږ به کوښښ کو، ترڅو په راتلونکي کې دغه ليګ له دې هم په ښه شکل ترسره کړو.
دغه سيالۍ د لس لوبډلو ترمنځ له ۵۷ کيلو ګرام څخه تر ۱۲۵ کيلو ګرام پورې په بېلابېلو وزنونو کې ترسره شوې، چې په پايله کې يې قوشتېپې لوبډلې لومړی مقام، اخوت لوبډلې دويم مقام او ستارهها لوبډلې بیا درېيم مقام ترلاسه کړ.
د يادو سياليو موخه د غوره استعدادونو موندل و، چې په پای کې يې مقام ګټونکو لوبډلو ته کپونه، مډالونه، تصديق پاڼې او نورې ډالۍ ورکړل شوې.
