غزني؛ د فوټبال میدان د ورزش ادارې رهبري په حضور کې تر بیا رغاونې وروسته د شاندارو مراسمو پر مهال پرانیستل شو
په غزني ولایت کې د فوټبال میدان، چې تېر کال د سېلابونو له امله زیانمن شوی و، نن ورځ تر بیا رغاونې وروسته د هیواد د ورزش ادارې د رهبري هيئت په حضور کې د شاندارو ورزشي نمایشاتو او بېلابېلو نندارو په ترڅ کې پرانیستل شو.
د یاد میدان د پرانیستلو په مراسمو کې د المپیک ملي کمېټې او سپورټ عمومي رئيس مولوي احمدالله وثیق، د بدني روزنې او سپورټ عمومي ریاست فني او مسلکي مرستیال حافظ احمدجان ځدراڼ، د یادې ادارې ورزش سلاکار قاري حیات الله رحماني، د غزني ولایت مرستیال والي مولوي رحیم الله محمود، د فوټبال فدراسیون رئيس محمدیوسف کارګر، د بدني روزنې او سپورټ عمومي ریاست فني او مسلکي رئيس عبدالمومن راد، د غزني ولایت د ورزش آمر حاجي بلال م.ج.اهد، سلګونو ورزشکارانو او ګڼو د ورزش مینوالو ګډون کړی و.
یادو مراسمو ته د المپیک ملي کمېټې او سپورټ عمومي رئيس مولوي احمدالله وثیق وویل:
((د ورزش په برخه کې وروستي پرمختګونه دا په ګوته کوي، چې حاکم نظام د ورزش هر اړخیز او کلک ملاتړ کوي او په چين هیواد کې زموږ د ورزشکارانو د پنځو مډالونو ګټل يې ښې بېلکې دي.))
هغه زیاته کړه، پخوا به مو هره ورځ د سلګونو ځوانانو د مرګ خبرونه اورېدل؛ خو اوس د وژنو هېڅ خبر نه لرو؛ بلکې پر ځای يې د ابادۍ او پرمختګ خبرونه اوروو.
دغه راز نوموړي ژمنه وکړه، چې د یاد میدان د لایټینګ سیستم به هم برابروي؛ ترڅو د اوړي په موسم کې ورزشکاران د شپې پر مهال هم خپلې لوبې په ښه او غوره فضاء کې ترسره کړي.
ورپسې د غزني ولایت مرستیال والي مولوي رحیم الله محمود د ورزش ادارې رهبري هيئت ته د ښه راغلاست او هرکلي ترڅنګ د یاد میدان پر بیا رغاونه خوښي څرکنده کړه او دا يې د ورزش په برخه کې د پرمختګونو او ابادۍ زېری یاد کړ.
دغه راز د بېلابېلو ورزشي رشتو د ورزشکاران له لوري د په زړه پوري نمایشاتو او نندارو تر وړاندې کولو وروسته، د هیواد د فوټبال د ۱۹ کلنو ملي لوبډلې او غزني ولایت د فوټبال د منتخبه لوبډلو ترمنځ دوستانه لوبه هم وشو، چې د هیواد د ۱۹ کلونو ملي لوبډلې د غزني ولایت منتخبه لوبډلې ته د ۱/۰ ګولونو په توپیر ماتې ورکړه.
یاده دې وي، چې په پای د غزني ولایت د بدني روزنې او سپورټ آمریت له لوري، د هیواد د ورزش ادارې رهبري هيئت ته د یاد ولایت له دود سره سم ډالۍ ورکړل شوې.