افغان واليبال ملي لوبډله د مرکزي اسيا واليبال سياليو کې له دويم مقام ګټلو وروسته هېواد ته راستنه شوه
د افغانستان واليبال ملي لوبډله د مرکزي اسيا واليبال سياليو کې د دويم مقام ګټلو وروسته نن هېواد ته راستنه شوه، چې د هېواد ورزش ادارې رهبرۍ، ورزشي مسوولينو، د واليبال ملي فدراسيون مسوولينو او هېوادوالو له لوري يې تود هرکلی وشو.
د دې لوبډلې د ښه راغلاست په مراسمو کې د هېواد ورزش ادارې عمومي رئيس مولوي احمد الله وثيق، د المپيکي چارو رئيس داد محمد پاينده اختري، د دې ادارې او والیبال فدراسیون بېلابېلو مسؤلینو، د واليبال ملي فدراسيون رئیس سيد عبدالرحيم سادات، د کام ایر هوايي شرکت حقوقي مشاور څارنمل محمد عثمان فاروق او يو شمېر هېوادوالو ګډون کړی وو.
د دې لوبډلې د ښه راغلاست په مراسمو کې د المپيک، بدني روزنې او ورزش عمومي رياست عمومي رئيس ښاغلي مولوي احمد الله وثيق، د مرکزي اسيا واليبال سياليو کې د واليبال ملي لوبډلې په دويم مقام ترلاسه کولو خوښې وښوده او د دغه ستر وياړ مبارکي يې ټولو ورزشکارانو او هېوادوالو ته وويله.
دغه راز نوموړي زياته کړه، چې واليبال ملي لوبډلې دغه ستره بريا د هېواد ورزش ادارې د کلک ملاتړ، د واليبال فدراسيون، روزونکو او لوبغاړو د نه ستړې کېدونکو هڅو او کوښښونو په پايله کې ترلاسه کړې او ډاډ يې ورکړ، چې موږ به تل د خپلو لوبغاړو کلک ملاتړ ته دوام ورکوو او دوی ته به اسانتياوې برابرو.
د والیبال ملي فدراسیون رئیس سید رحیم سادات هم دغه بریا ستره لاسته راوړنه یاده کړه او په دې بریا کې یې د ورزش ادارې، د فدراسیون د کادري غړیو او روزونکو رول مهم وباله.
واليبال ملي لوبډلې په دې سياليو کې ټولې ۶ لوبې ترسره کړې، چې په درې برياو له ترکمنستان سره د دې سياليو پايلوبې ته ووتله، چې په پايلوبه کې يې له يوې په زړه پورې لوبې وروسته له خپلې سيالې لوبډلې څخه د ۲/۳ ميدانونو په توپير ماتې وخوړه او دويم مقام سره هېواد ته راستنه شوه.
د ويلو ده، چې د ۲۰۲۵ مرکزي اسيا واليبال سيالۍ د شپږ اسیايي هېوادونو افغانستان، بنګله دېش، سريلانکا، نیپال، مالديف او ترکمنستان ترمنځ د بنګله دېش په کوربتوب د روانې ميلادي مياشتې پر ۲۲مه نېټه پيل او د اکتوبر پر ۲۸مه د ترکمنستان واليبال ملي لوبډلې په لومړي مقام او د افغان واليبال ملي لوبډلې په دويم مقام ګټلو پای ته ورسېدې.
