اټک انرژي لوبډله د افغانستان د اتلانو ليګ اتله شوه
د دې ليګ د پاى په مراسمو کې د المپيک ملي کمېټې او سپورټ عمومي رئيس انجنير نظرمحمد مطمئن، د ملي راډیو تلویزیون رئیس مولوي احمدالله وثيق، د المپیک ملي کمېټې او سپورټ عمومي ریاست فني او مسلکي مرستیال حافظ احمد جان، د المپيک ملي کمېټې اجراييه رئيس داد محمد پاينده اختر، د فوټبال فدراسيون مشر محمد يوسف کارګر، د امر بالمعروف او نهي عن المنکر وزارت د نشراتو رئیس عاکف مهاجر، د بدني روزنې او ورزش عمومي رياست د دفتر رئیس محمدالله احساس، د اطلاعاتو او عامه پوهاوي رئیس الله محمد اتل مشواڼي او يو شمېر نورو لوړپوړو چارواکو او د ورزش د ادارې مسولينو ګډون درلود.
دغه ليګ مياشت وړاندې د ١٢ لوبډلو په ګډون د افغانستان د فوټبال فدراسیون په فوټبال لوبغالي کې پيل شو، چې د هرات استازي اټک انرژي په اتلولي پاى ته ورسېد.
په دې ليګ کې ګډون کوونکي لوبغاړي وايي؛ د داسې ليګونو ترسره کېدل په افغانستان کې د فوټبال د کيفيت په لوړېدو مستقیم اغېز لري.
له بلي خوا د فوټبال فدراسیون يو تن مسوول وايي؛ د دې ليک اتلان کولای شي، چې د اسيا اتلانو په ليګ کې ګډون وکړي او د افغانستان د فوټبال فدراسیون به هڅه وکړي، چې په راتلونکي کې دافغانستان په اتلانو ليګ کې زياتو لوبډلو ته د ګډون ته زمينه برابره کړي.
د يادولو ده، چې د دې سياليو په پاى کې د اټک انرژي د ٣١ امتیازونو په ترلاسه کولو سره لومړى د فراه ولایت ابو مسلم لوبډلې دويم او د سرپل ولایت په استازيتوب خديم اف سي لوبډلې د دې لوبو درېيم مقام خپل کړ.
