بغلان؛ مرکز پلخمري ښار کې د ٢٤ لوبډلو ترمنځ د ټېپ بال کرېکټ سیالۍ پای ته ورسېدې
د بغلان ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت مرکز پلخمري ښار کې د ٢٤ لوبډلو ترمنځ د ټېپ بال کرېکټ سیالۍ د وزیر آباد لوبډلې په اتلولي پای ته ورسېدې.
د یادو سیالیو پایلوبه د بلاکو ځوانانو او وزیر آباد ځوانانو لوبډلو ترمنځ ترسره شوه. د لوبې پچه بلاکو ځوانانو لوبډلې وګټله او لومړی یې توپ وهنه وکړه، چې په ټاکلو شپږو اورونو کې یې خپلې سیالې لوبډلې ته د ٥٥ منډو هدف وټاکه. وزیر آباد لوبډلې ټاکلی هدف پرته له کومې ویکټې د لوبې په درېیم اور کې ترلاسه کړ او د لسو ویکټو په توپیر یې د دغو سیالیو اتلولي وګټله.
دا سیالۍ د ځوانانو لپاره د سالمې بوختیا په موخه ترسره شوې، چې دوې اوونۍ یې دوام وکړ.
