بلخ کې د ۱۰۰ پهلوانانو ترمنځ د پهلوانۍ ټاکنیزې سیالۍ وشوې
د بلخ ولايت د بدني روزنې او ورزش رياست اړوند د پهلوانۍ ملي فدراسيون د استازولۍ له لوري د مرکز مزارشريف ښار په رحيمي کمپ کې د ۱۰۰ پهلوانانو ترمنځ د پهلوانۍ ټاکنیزې سیالۍ وشوې.
دغه سيالۍ د ځوانانو او لويانو په عمري او لسو بېلابېلو وزني کټگوريو کې ترسره شوې، چې په پايله کې له هر وزن څخه څلور تنه، چې ټولټال ۴۰ تنه غوره پهلوانان کېږي د بلخ ولايت منتخبې لوبډلې ته وټاکل شول.
د يادو سياليو موخه د ياد ولايت منتخبې لوبډلې ته د غوره پهلوانانو موندل وو، چې يوه ورځ يې دوام وکړ.
