تخار کې د څلورو لوبډلو ترمنځ د والیبال سیالۍ د دویم بلاک لوبډلې په اتلولۍ پای ته ورسېدې
د تخار ولایت د بدني روزنې او ورزش امریت اړوند د والیبال ملي فدراسیون د استازولۍ له لوري د یاد ولایت په محبس کې د څلورو لوبډلو ترمنځ د والیبال سیالۍ، چې یوه اونۍ مخکې پيل شوې وې د دویم بلاک لوبډلې په اتلولۍ پای ته ورسېدې.
د دغو سیالیو په پایلوبه کې دویم بلاک لوبډلې خپلې سیالې صفاالدین لوبډلې ته د ۳/۲ میدانونو په توپير ماتې ورکړه او اتلولي یې خپله کړه.
د یادو سیالیو موخه د والیبال لوبو ته وده ورکول او د لوبغاړو ترمنځ یووالی رامنځته کول و؛ د سیالیو په پای کې غوره لوبغاړو ته چمتو شوې ډالۍ ورکړل شوې.
