جوزجان؛ مرکز شبرغان کې د ۱۰ لوبډلو ترمنځ د فوټسال سیالۍ پای ته ورسېدې
د جوزجان ولایت د بدني روزنې او ورزش امریت اړوند د فوټبال ملي فدراسیون د استازولۍ له لوري د یاد ولایت په مرکز شبرغان کې د ۱۰ لوبډلو ترمنځ د فوټسال سیالۍ، چې ۲۰ ورځې مخکې پيل شوې وې د سېلاب اقچه کلب لوبډلې په اتلولۍ پای ته ورسېدې.
دغه سیالۍ د تجربه لرونکو ورزشکارانو ترمنځ ترسره شوې، چې په پایله کې د سېلاب اقچه کلب لوبډلې خپلې سیالې یاران کلب لوبډلې ته د ۳/۱ ګولونو په توپير ماتې ورکړه او اتلولي یې خپله کړه.
د یادو سیالیو موخه د فوټسال ورزش ته د لوبغاړو هڅوول و.
د سیالیو په پای کې غوره لوبډلې ته د اتلولۍ جام، یو خوسی او چمتو شوې ډالۍ ورکړل شوې.
