جوزجان ؛ مرکز شبرغان ښار کې د ۱۰ لوبډلو ترمنځ د فوټبال غوره لیګ سیالۍ پای ته ورسېدې
د جوزجان ولایت د بدني روزنې او ورزش امریت اړوند د فوټبال ملي فدراسیون د استازولۍ له لوري د یاد ولایت په مرکز شبرغان ښار کې د ۱۰ لوبډلو ترمنځ د فوټبال غوره لیګ سیالۍ د ماډرن کلب لوبډلې په اتلولۍ پای ته ورسېدې.
د دغو سیالیو په پایلوبه کې ماډرن کلب لوبډلې خپلې سیالې نایاب کلب لوبډلې ته د ۱/۰ ګول په توپير ماتې ورکړه او اتلولي یې خپله کړه.
د یادو سیالیو موخه د فوټبال ورزش ته وده ورکول او د جوزجان ولایت په استازیتوب د شمال زون سیالیو ته د غوره لوبډلې موندل و، چې درې میاشتې یې دوام وکړ.
د سیالیو په پای کې د جوزجان ورزشي امریت له لوري غوره لوبډلې ته د اتلولۍ جام او یو پسه ورکړل شو او غوره لوبغاړو ته کپ، مډالونه او ستاینلیکونه ورکړل شول.
