خوست؛ د تڼیو ځوانانو د یووالي په نوم د کبډي سیالیو اتلولي د تڼي ذبيح لوبډلې وګټله
د خوست ولایت ورزشي امرت اړوند د کبډي فدراسیون له لوري د تڼیو ځوانانو د یووالي په نوم د کبډي سیالې د تڼي ذبيح لوبډلې په اتلولۍ پای ته ورسیدې.
د کبډي دغه سیالۍ، چې یوه نیمه میاشت وړاندې د یادې سیمې د ځوانانو له لوري پیل شوې وې، د خوست ولایت له بیلابېلو ولسوالیو څخه پکې ۲۲ کلبونو برخه اخیستې وه.
د سیالیو پايلوبې ته د ذبيح تڼي او استاد نبي قربان لوبډلې وتلې وې. له په زړه پورې لوبې وروسته د ذبيح تڼي لوبډلې پایلوبه د ۵۵/۵۲ په توپیر په خپل نوم کړه.
د دې سیالیو غوره دفاع کوونکی اسلام الدین منګل، غوره امتیاز ګټونکی مطیع الله او غوره لوبډلمشر استاد نبي قربان ونومول شول.
په پایله کې غوره لوبډلو او لوبغاړو ته کپونه او مډالونه ورکړل شول.
