خوست کې د اوو لوبډلو ترمنځ د ټېپ بال کرېکټ سیالۍ پیل شوې
د خوست ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت مرکز اړوند صحرا سیمه کې د اوو لوبډلو ترمنځ د ټېپ بال کرېکټ سیالۍ پیل شوې.
د دغو سیالیو لومړۍ لوبه د صحرا بازانو او صحرا تندر لوبډلو ترمنځ ترسره شوه. د لوبې پچه صحرا بازانو لوبډلې وګټله او لومړی یې توپ وهنه وکړه چې په ټاکلو لسو اورونو کې یې د درېیوو ویکټو په زیان سره خپلې سیالې لوبډلې ته د ١٥٣ منډو هدف وټاکه. صحرا تندر لوبډلې د هدف په تعقیب کې د خپلو نهو لوبغاړو په زیان سره ١٢٣ منډې وکړې او د ٢٩ منډو په توپیر یې لوبه وبایلله.
دا سیالۍ د ځوانانو ترمنځ د یووالي په موخه پیل شوي دي چې دوې میاشتې به دوام وکړي.
