د جمهوري رياست دوېم معاونيت د فوټسال شل کلنو لوبډلې لوبغاړي وستايل.
د جمهوري رياست دوېم معاونيت د فوټسال شل کلنو لوبډلې لوبغاړي وستايل. افغان شل کلنو په دې وروستيو کې د اسيايي فوټسال اتلولۍ دوېم مقام ګټلی او تېره ورځ د ولسمشرۍ ماڼۍ دوېم معاونيت دفتر لخوا وستايل شول. د ستايغونډې په پېل کې د بدني روزنې او ورزش رياست او المپیک ملي کمېټې مشر دوکتور حفيظ الله ولي رحيمي له دويم معاونيت څخه مننه وکړه چې لوبغاړو ته پاملرنه او ملاتړ کوي. د جمهوري رياست دوېم مرستيال استاد سرور دانش د ورزش له مسؤلينو او ورزشکارانو څخه مننه وکړه چې افغانستان يې وياړونه او خوښئ راوړي او د دوی هڅې يې وستايلې.
ښاغلي دانش وويل حکومت د ورزش د ودې او پرمختګ لپاره ژمن دی او له ښه مرغه په وروستيو کې د دولت او د بدني روزنې د رهبرۍ د پاملرنې له کبله ورزش په ښه ډول پرمختګ کړی. د ستاېنغونډې په پای کې د جمهوري رياست دوېم معاونيت لخوا د ورزش مسؤلينو، د فوټسال لوبغاړو او وروزنکو ته ستاينليکونه ورکړل شول. په دې غونډه کې د المپیک د ملي کمېټې او د بدني روزنې او ورزش رياست مرستيالانو، د فوټبال فدراسيون سرپرست مشر يوسف کارګر او د يو شمېر نورو فدراسيونو مشرانو هم ګډون کړی و.
