د عمر فاروق لېسې لوبډلې د بغلان ولایت پلخمري ښار د فوتسال سياليو اتلولي وګټله
د بغلان ولایت د بدني روزنې او ورزش امريت په همغږۍ د دې ولايت د پوهنې ریاست ورزشي کمېټې له لوري د پلخمري ښار په مرکزي جمنازيوم کې د پلخمري لېسو د ١٤ لوبډلو ترمنځ د فوتسال سيالۍ د عمر فاروق لېسې لوبډلې په ګټه پاى ته ورسېدې.
دغو سياليو، چې لس ورځې يې دوام وکړ، په پايلوبه کې يې د عمر فاروق لېسې لوبډلې د ٥-٤ ګولونو په توپیر تمدن شمال لېسې ته ماتې ورکړه او د دې سياليو اتلولي يې خپله کړه.
د دغو سياليو موخه د بغلان ولایت د پوهنې ریاست د فوتسال منتخبې لوبډلې ته د غوره لوبغاړو په ګوته کول دي.
په پاى کې د دې سياليو د دايرونکو مسوولینو له لوري غوره لوبدلو او ورزشکارانو ته کپونه او مډالونه ورکړل شول.
