د فوټسال ملي لوبډلې لوبغاړي کابل ته راغلل او تود هرکلی یې وشو
د افغانستان فوټسال ملي لوبډلې درې لوبغاړي فرزاد محمودي، امید قنبري او ناصر د آسیايي ملتونو فوټسال جام سیالیو کې له بهترینو لوبو کولو وروسته کابل ته راغلل او تود هرکلی یې وشو.
د یادو لوبغاړو د ښه راغلاست په مراسمو کې، چې د فوټبال فدراسیون اړوند د فوټسال کمېټې په ورزشي جمنازیوم کې نیول شوي و، د بدني روزنې او ورزش لوی رئیس مولوي احمدالله وثیق، د یاد ریاست فني او مسلکي مرستیال حافظ احمد جان ځدراڼ، ورزشي سلاکار قاري حیات الله رحماني، او نورو ګڼو مسؤولانو، مېلمنو، ورزشي خبریالانو او د فوټسال مینوالو ګډون کړی و.
دا په داسې حال کې ده، چې د افغانستان فوټسال ملي لوبډله د آسیايي ملتونو فوټسال جام سیالیو کې ښه وځلېده او نړۍوال جام ته د پلې آف سیالیو کې یې بریاوې خپلې کړې او د ۲۰۲۴ نړۍوال جام سیالیو ته یې لار ومونده.
