د میدان وردګ ولایت د سپورت امریت له لوري د هرات او بادغیس زلزله ځپلو ته د قرآن عظیم الشان ختم ترسره شو
د میدان وردګ ولایت د بدني روزنې او ورزش آمریت او ورزش کارانو له لوري د هرات او بادغيس ولايتونو له زلزله ځپلو خلکو سره د مرستې راټولولو کمپاین، د قرآن کریم ختم او ورزشي نمایشات ترسره شول.
د میدان وردګ ولایت د اطلاعاتو او فرهنګ رئیس مولوي حبیب الله مجاهد د دغه ولایت له ټولو خلکو او په خاص ډول له بډایه خلکو څخه وغوښتل تر څو د اعانې صندوق له لارې د هرات له زیانمنو کورنیو سره مرسته وکړي.
ښاغلي مجاهد د ورزشکارانو احساس وستایه او د دوی د هڅونې په موخه یې ۵۰۰۰ افغانۍ نغدي مرسته وکړه.
د بدني روزنې او سپورت آمریت آمر ښاغلي ذبیح الله وهاج وویل: "د دغه سپورټي نمایشونو د ننداره چيانو له ټکټ څخه راټولې پیسې په میدان وردګ ولایت کې د زلزله ځپلو خلکو سره د اعانې صندوق ته ورکړي تر څو د هرات او بادغيس ولايتونو زیانمنو شویو خلکو ته ورسيږي."
د یادونې وړ ده، چې دا لومړی ځل دی په میدان وردګ کې د بدني روزنې او سپورت آمریت او ورزش کاران له زلزله ځپلو سره د مرستې او همدردۍ په موخه سپورتي نمایشونه نندارې کيږي.
