د هېواد د فوټبال برخې روزونکو ته د مدرسۍ او د روزنې سندونه ورکړل شول

د اسيا فوټبال فدراسيون (AFC ) له لوري هغه روزونکو ته، چې سږ کال يې ښوونيزو کورسونو کې برخه اخيستې وه او په وروستیو پایلو او امتحانونو کې له کاميابېدو وروسته د اسيا فوټبال لایسنس A درجې د مدرسۍ او د A.B.C درجې د روزنې نړيوالو سندونو د ورکړې مراسم ترسره شول.

دغه ښوونيز کورسونه د هېواد د مدرسینو او استادانو محمد يوسف کارګر او د طاهر روفي له لوري په ۲۰۲۵ ميلادي کال کې تدريس شول، چې د اسيا فوټبال لایسنس A درجې کورس څلور مياشتې، لایسنس B درجې کورس دوې مياشتې او لایسنس C درجې کورس بيا دوې اوونۍ دوام وکړ.

په ياده دوره کې ۶۰ تنو روزونکو په خپلو امتحانونو کې له کاميابېدو او د اسيا فوټبال فدراسيون له تاييد وروسته د روزنې لایسنس A.B.C درجې سندونه ترلاسه کړل او همدارنګه محمد يوسف کارګر او طاهر روفي ته، يادو روزونکو ته د تدریس د ورکړې سندونه ورکړل شول.

د سندونو د ورکړې په دغو مراسمو کې د المپيک، بدني روزنې او ورزش عمومي رياست فني او مسلکي مرستیال حافظ احمد جان ځدراڼ، ورزشي مشاور قاري حیات الله رحماني، د فوټبال ملي فدراسیون رئیس محمد يوسف کارګر او روزونکو ګډون کړی وو.

په دغو مراسمو کې د المپيک، بدني روزنې او ورزش فني او مسلکي مرستیال حافظ احمد جان ځدراڼ د لوی اختر د مبارکۍ ترڅنګ د لایسنس A.B.C درجې د روزنې کورسونه، چې تېر کال ترسره شول د هېواد د ورزش لپاره ارزښتمن وبلل او همدارنګه د فوټبال او په نورو ورزشي څانګو کې دې ته ورته ښوونيز کورسونه د ورزش مهمه سرچينه ياده کړه او ياد کورسونه د مډالونو، لاسته راوړنو او اتلوليو نتيجه ياده کړه.

د مراسمو په پای کې د ورزش مسؤلینو د دغه ډول ښوونيز برنامو په دوام او د روزونکو د وړتيا په لوړولو تاکید وکړ او دغه کورسونه يې په راتلونکي کې د فوټبال لپاره ګټور ياد کړل.