د هېواد د ورزش ادارې رهبري د بلخ ولایت له ورزش ریاست څخه لیدنه وکړه
د المپیک، بدني روزنې او ورزش عمومي رئیس مولوي احمدالله وثیق او ورسره مل پلاوي يې بلخ ولایت ته د سفر په ترڅ کې د یاد ولایت له د بدني روزنې او ورزش ریاست له اداري کارکوونکو، اداري ودانۍ او ورزشي اماکنو څخه لیدنه وکړه.
په دغه لیدنه کې د هېواد د ورزش ادارې عمومي رئیس مولوي احمدالله وثیق، د ياد رياست فني او مسلکي مرستیال حافظ احمدجان ځدراڼ، ورزشي ستر سلاکار قاري حیات الله رحماني او ورسره مل پلاوي، د بلخ ولایت د ورزش رئیس مولوي نور علم بدر، د ياد رياست د بېلابېلو ورزشي برخو استازو او اداري کارکوونکو ګډون کړی و.
د لیدنې په پیل کې د بلخ ولایت د بېلابېلو ورزشي فدراسیونونو استازو د هېواد د ورزش ادارې رهبري ته د ښه راغلاست ترڅنګ خوښي وښوده او مننه یې وکړه، چې د دغه ولایت د ورزشي وضعیت د لیدلو لپاره یې ياد ولايت ته سفر کړی دی.
د بېلابېلو ورزشي فدراسیونونو استازو د بلخ ولایت د مختلفو ورزشي فعالیتونو او پرمختګونو پر اړه خبرې وکړې او هیله یې وښوده چې د ورزش لا ودې لپاره د ورزشکارانو ملاتړ وشي.
ښاغلي وثیق هم په ملي او نړۍواله کچه د ياد ولايت د ورزشکارانو هڅې او لاسته راوړنې وستایلې او ژمنه یې وکړه چې د ورزشکارانو د عصريې، ورزشي اماکنو د جوړولو او تشکیلاتي برخو کې به له دوی سره د توان تر کچې همکاري کوي.
