د يما پطرول افغانستان وزلوبې ليگ اووم پړاو سياليو په دويمه ورځ درې سیالۍ وشوې
د المپيک، بدني روزنې او ورزش عمومي رياست په همکارۍ او د وزلوبې، نيزه وهنې او سيمه ييزو لوبو ملي فدراسیون له لوري د کابل ښار په يکه توت لوبغالي کې د ۱۱ لوبډلو ترمنځ د يما پطرول افغانستان ليگ اووم پړاو سياليو دويمه ورځ د بغلان، کندز او بدخشان لوبډلو په برياوو پای ته ورسېده.
د يادو سياليو په څلورمه لوبه کې بغلان لوبډلې خپلې سيالې هرات لوبډلې ته د ۱۴ پر ۱ امتيازونو په توپير، پنځمه لوبه کې کندز لوبډلې سيالې فارياب لوبډلې ته د ۷ پر ۰ امتيازونو په توپير او شپږمه لوبه کې بيا بدخشان لوبډلې خپلې سيالې تخار لوبډلې ته د ۵ پر ۰ امتيازونو په توپير سره ماتې ورکړې او بریاوې يې خپلې کړې.
د ويلو ده، چې د يما پطرول؛ افغانستان وزلوبې ليگ اووم پړاو سيالۍ به د بهرنيو لوبغاړو په گډون د کندز، فارياب، بلخ، بدخشان، تخار، باميان، سرپل، پنجشير، سمنگان، بغلان او هرات لوبډلو ترمنځ ترسره کېږي، چې لس ورځې به نور هم دوام ومومي.
