د يما پټرول وزلوبې اووم پړاو سیالیو پر دوام؛ سرپل، بغلان او بدخشان لوبډلو بریاوې خپلې کړې
د هېواد المپيک، بدني روزنې او ورزش عمومي رياست په همکارۍ، د وزلوبې، نيزه وهنې او سيمه ييزو لوبو ملي فدراسیون له لوري د کابل ښار په يکه توت لوبغالي کې د ۱۱ لوبډلو ترمنځ د يما پطرول افغانستان اووم پړاو ليگ سياليو اوومه ورځ د سرپل، بغلان او بدخشان لوبډلو په برياوو پای ته ورسېده.
د وزلوبې اووم پړاو ليگ سياليو په اوولسمه لوبه کې سرپل لوبډلې سيالې بلخ لوبډلې ته د ١٣ پر صفر نمرو په توپير، اتلسمه لوبه کې بغلان لوبډلې سيالې تخار لوبډلې ته د ٦ پر یو نمرو په توپير ماتې ورکړه. همداراز ټاکل شوې وه، چې د دغو سیالیو نولسمه لوبه به د بدخشان او کندز لوبډلو ترمنځ ترسره شي خو کندزۍ لوبډلې له لوبې کولو انکار وکړ او سیالۍ د ټاکل شوې کمېټې له لوري د بدخشان لوبډلې په ګټه اعلان شوه.
ټاکل شوې چې د اته غوره لوبډلو پړاو په وروستۍ ورځ به سبا (جمعه) سرپل له بغلان، پنجشیر له هرات او بلخ له تخار لوبډلې سره سیالۍ وکړي.
