د کرېکټ ملي اتل ارواښاد شاپور ځدراڼ جنازه کابل ته راورسېده
د المپیک، بدني روزنې او ورزش عمومي رئیس مولوي احمدالله وثیق، د یاد ریاست رهبري غړو او د بېلابېلو ورزشي رشتو ګڼو ورزشکارانو د افغانستان د کرېکټ ملي لوبډلې د پخواني لوبغاړي ارواښاد شاپور ځدراڼ جنازې ته د درناوي او د نوموړي له کورنۍ سره د خواخوږي او غمشریکي څرګندولو په موخه کابل نړۍوال هوایي ډګر ته ورغلل.
د ورزش ادارې عمومي رئیس مولوي احمدالله وثیق د ارواښاد شاپور ځدراڼ کورنۍ، خپلوانو او د افغانستان ټول ولس ته خواخوږي څرګنده کړه او د هغه مړینه یې د هېواد د ورزش، په ځانګړي ډول د افغانستان د کرېکټ لپاره ستره ضایعه وبلله.
شاپور ځدراڼ له نږدې څلورو میاشتو راهیسې د ناروغۍ پر بستر پروت و، چې تېره ورځ یې د هندوستان په یوه روغتون کې ساه ورکړه او جسد یې نن کابل ته راوړل شو.
ټاکل شوې، چې د ښاغلي ځدراڼ د جنازې لمونځ به سبا پنجشنبه د کابل ښار په عیدګاه جومات کې ادأ او له لمانځه وروسته به یې جنازه په مرنجان غونډۍ کې خاورو ته وسپارل شي.
