سرپل مرکز کې د ۳۶ کورشکارانو ترمنځ د کورش سیالۍ وشوې
د سرپل ولایت د بدني روزنې او ورزش امریت اړوند د کورش ملي فدراسیون د استازولۍ له لوري د یاد ولایت په مرکز کې له مرکز او ولسیوالیو د ۳۶ کورشکارانو ترمنځ د کورش سیالۍ ترسره شوې، چې یوه ورځ یې دوام وکړ.
د دغو سیالیو په پایله کې د دوو جوړو لوبې مساوي او ۱۶ کورشکارانو بیا خپلو سیالانو ته په ماتې ورکولو سره بریاوې او د اتلولۍ مقامونه خپل کړل.
د یادو سیالیو موخه د کورش ورزش ته وده ورکول او د کورشکارانو ترمنځ یووالی رامنځته کول و؛ د سیالیو په پای کې غوره کورشکارانو ته چمتو شوې ډالۍ ورکړل شوې.
