سرپل کې د ۶۵ چاپ اندازانو ترمنځ د وزلوبې سيالۍ پای ته ورسېدې
د المپیک، بدني روزنې او ورزش ریاست اړوند د وزلوبې ملي فدراسیون له لوري د سرپل ولایت مرکز کې د ۶۵ چاپ اندازانو ترمنځ د وزلوبې سيالۍ پای ته ورسېدې.
د دغو سیالیو د پای په مراسمو کې د المپیک، بدني روزنې او ورزش ریاست عمومي ريیس مولوي احمدالله وثیق، د ياد رياست فني او مسلکي مرستیال حافظ احمد جان ځدراڼ، ورزشي ستر سلاکار قاري حیات الله رحماني، قومي مشرانو، ورزشکارانو او د وزلوبې زرګونو مینوالو ګډون کړی وو.
د دغو سياليو په پای کې د ميدان د حکم له لوري یو اخراولاق اعلان شو، چې امین الله پهلوان خوسی د حلال تر دايرې ورساوه او د دوه زره امریکايي ډالرو، یو عراده موټر او یوې قالینې ګټونکی شو.
د یادونې وړ ده، چې دا سیالۍ د ملي سوداګر حاجي متين بای د زوی د واده د مراسمو په موخه ترسره شوې، چې دوې ورځې يې دوام وکړ.
