غزني؛ د ګیلان ولسوالۍ د کوچني اختر په مناسبت د والیبال سیالۍ د ازاد والیبال لوبډلې په اتلولۍ پای ته ورسېدې
د غزني ولایت په ګیلان ولسوالۍ کې د کوچني اختر په مناسبت د والیبال سیالۍ، چې د روانې میاشتې په ۶مه نېټه پیل شوې وې، د ازاد والیبال لوبډلې په اتلولۍ پای ته ورسېدې.
یادې سیالۍ د ۱۸ لوبډلو ترمنځ ترسره شوه او پایلوبې ته یې ازاد او چمبر والیبال لوبډلو لار موندلې وه، چې په پایله کې ازاد والیبال لوبډلې خپلې سیالې لوبډلې ته د ۳-۰ میدانونو په توپیر ماتې ورکړه او اتلولي یې خپله کړه.
باید یادونه وشي چې د دغو سیالیو او ټورنمنټ غوره لوبغاړی محمد رسول و نومول شو.
په پای کې غوره لوبډلو او لوبغاړو ته کپونه او مډالونه ورکړل شول.
