لغمان؛ قرغیو ولسوالۍ کې د ١٦ لوبډلو ترمنځ د ټېپ بال کرېکټ سیالۍ پای ته ورسېدې
لغمان ولایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د ياد ولايت په قرغیو ولسوالۍ کې د ١٦ لوبډلو ترمنځ د ټېپ بال کرېکټ سیالۍ د مشعل عابد لوبډلې په اتلولي پای ته ورسېدې.
د یادو سیالیو پایلوبه د مشعل عابد او ثنأ ګل لوبډلو ترمنځ ترسره شوه. د لوبې پچه ثنأ ګل لوبډلې وګټله او لومړی یې توپوهنه وکړه، چې په ټاکلو اتو اورونو کې یې د خپلو ټولو لوبغاړو په له لاسه ورکولو سره خپلې سیالې لوبډلې ته د ٦٤ منډو هدف وټاکه. مشعل عابد لوبډلې یاد هدف د خپلو دوو لوبغاړو په له لاسه ورکولو سره د لوبې په څلورم اور کې ترلاسه کړ او د اتو ویکټو په توپیر یې د دغو سیالیو اتلولي وګټله.
دا سیالۍ د ځوانانو لپاره د سالمې تفرېح د برابرولو په موخه ترسره شوې، چې ٢١ ورځې یې دوام وکړ.
