لغمان؛ قرغیو ولسوالۍ کې د ۶۴ لوبډلو ترمنځ د ټېپ بال کرېکټ سیالۍ پای ته ورسېدې
د لغمان ولایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د ياد ولايت په قرغیو ولسوالۍ کې د ٦٤ لوبډلو ترمنځ د ټېپ بال کرېکټ سیالۍ د داوود پشهیي لوبډلې په اتلولي پای ته ورسېدې.
د یادو سیالیو پایلوبه د داوود پشهیي او شمشير آباد لوبډلو ترمنځ ترسره شوه. د لوبې پچه داوود پشهیي لوبډلې وګټله او لومړی یې توپوهنه وکړه، چې په ټاکلو اتو اورونو کې یې خپلې سیالې لوبډلې ته د ١٥٩ منډو هدف وټاکه. شمشير آباد لوبډلې د هدف په تعقیب کې د ټولو ویکټو په زيان ٨١ منډې وکړې او د ٧٧ منډو په توپیر یې لوبه وبایلله
دا سیالۍ د ځوانانو ترمنځ د یووالي او سالمې تفرېح په موخه ترسره شوې، چې یوه میاشت یې دوام وکړ او په پای کې اتلې لوبډلې ته یو عراده بایسکل د ډالۍ په توګه ورکړل شو.
