لغمان کې د ۱۰۵ تنو ورزشکارانو ترمنځ د زورخانه يي ملي لوبډلې غوراوي سيالۍ پای ته ورسېدې
د لغمان ولايت د بدني روزنې او ورزش امريت په همکارۍ او د هېواد زور خانه يي ملي فدراسيون له لوري د ياد ولايت په مرکز مهترلام ښار کې د اوو ولايتونو د ۱۰۵ تنو ورزشکارانو ترمنځ د زور خانه يي ملي سيالۍ د غوره لوبغاړو په ټاکلو سره پای ته ورسېدې.
په يادو سياليو کې له کابل، پنجشېر، ميدان وردگ، هرات، باميان، ننگرهار او لغمان ولايتونو څخه په لسو بېلابېلو وزني کټگوريو کې ورزشکارانو گډون کړی وو، چې په پايله کې لغمان د ۱۲ مډالونو په ترلاسه کولو سره لومړی، کابل د ۹ مډالونو سره دويم او ننگرهار د ۸ مډالونو په تر لاسه کولو سره درېيم مقام خپل کړ او همدارنگه ۴۰ تنه غوره ورزشکاران بیا د هېواد زورخانه يي ملي لوبډلې ته وټاکل شول.
د يادولو وړ ده، چې د دغو سياليو د ترسره کېدو موخه د هېواد زور خانه يي ملي لوبډلې ته د غوره ورزشکارانو موندل وو، چې څلور ورځې يې دوام وکړ.
