مولوي احمدلله وثیق: په دولتي ادارو کې د دعوت او ارشاد ریاستونو تشکیل غوره ابتکار او د اسلام ښوونې په برخه کې اغېزمن ګام و
د هېواد د بدني روزنې او سپورټ عمومي ریاست د دعوت او ارشاد ریاست له لوري، د دې ادارې کارکوونکو ته د ديني علومو د درسي لړۍ د آزموینې د پایلو د اعلان او د ممتازو ګډونوالو لپاره ستاینغونډه جوړه شوه.
په دې غونډه کې د المپیک ملي کمېټې او سپورټ ریاست لوی رئیس مولوي احمدالله وثیق، د د دعوت او ارشاد عمومي رئیس شیخ الحدیث مولوي محمد هاشم شهید ورور او ورسره مل پلاوي، د المپیک ملي کمېټې او سپورټ ریاست مسؤولینو، اداري او خدماتي کارکوونکو برخه اخیستې وه.
د بدني روزنې او سپورټ ریاست لوی رئیس مولوي احمدالله وثیق، د غونډې ګډونوالو ته په وینا کې له امير المؤمنین شیخ الحدیث مولوي هبة الله آخوندزاده حفظه الله څخه ځانګړې مننه وکړه، چې د اداراتو په تشکیل کې یې د دعوت او ارشاد ځانګړي ریاستونه تأسیس کړل. نوموړي په خپلو خبرو کې د امارتـــــي ادارو د کار کوونکو لپاره د دعوتي او تدریسي زده کړو د لړۍ په ارزښت خبرې وکړې او زیاته یې کړه: په دولتي ادارو کې د دعوت او ارشاد ریاستونو تشکیل غوره ابتکار او د اسلام پوهنې په برخه کې اغېزمن ګام و، په هر مسلمان لازمه ده، چې د دیني احکامو زده کړې ته په خپل ژوند کې لومړيتوب ورکړي او په پوره توان د اسلام د مبارک دین په احکامو او تعلیماتو ځان پوه کړي.
ښاغلي وثیق په دولتي ادارو کې د دعوت او ارشاد تدریسي لړۍ اغېز بارز او محسوس وباله.
ورپسې د دعوت و ارشاد عمومي رئیس مولوي محمد هاشم شهید ورور د دیني علم او پوهې د حصول په ارزښت خبرې وکړې، نوموړي وویل: «د دولتي ادارو کارکونکو ته د دعوتي او تدریسي لړیو مفهوم دا نه دی، چې خدای مه کړه دا خلک له دیني او ایماني اړخه کمزورې دي، افغانان له پېړیو، نیکونو او اجدادو مسلمانان او د اسلام پیاوړي مدافعین دي، له دې تدریسي لړیو یې موخه د اسلام د مبارک دین د احکامو لا ښه زده کولو او مذاکره ده.»
د غونډې په پای کې د المپیک ملي کمیټې او سپورت عمومي ریاست کارکوونکو ته د دې ادارې د دعوت او ارزشاد ریاست له لوري د اخیستل شوې آزموینې پایلې اعلان او ممتازو ګډونوالو ته یې ډالۍ او ستاینلیکونه ووېشل شول.
