ميدان وردگ کې د ۳۰۰ پهلوانانو ترمنځ د پهلوانۍ ټاکنيزې سيالۍ پای ته ورسېدې
د ميدان وردگ ولايت د بدني روزنې او ورزش آمريت او د پهلوانۍ ملي فدراسيون په گډه همکارۍ د ياد ولايت په مرکز کې له ۱۷ کلبونو د ۳۰۰ پهلوانانو ترمنځ د پهلوانۍ سيالۍ، چې درې ورځې يې دوام وکړ پای ته ورسېدې.
په دغو سياليو کې پهلوانانو له ۵۷ څخه تر ۱۲۰ کيلو گرام وزنونو کې د يو بل پر وړاندې سيالۍ ترسره کړې، چې په پايله کې ۴۰ غوره پهلوانان د ياد ولايت منتخبې لوبډلې ته وټاکل شول.
د يادو سیالیو موخه د ميدان وردگ ولايت منتخبې لوبډلې ته د غوره پهلوانانو موندل وو او په پای کې ټاکل شويو پهلوانانو ته مډالونه او د اتلولۍ حکمونه ورکړل شول.
