میدان وردګ؛ په مرکز کې د ۱۵۰ ورزشکارانو ترمنځ د پهلوانۍ ټاکنیزې سیالۍ ترسره شوې
د میدان وردګو ولایت د بدني روزنې او ورزش آمریت اړوند پهلوانۍ فدراسیون له لوري د ۱۵۰ ورزشکارانو ترمنځ د یاد ولایت په کچه د منتخبې لوبډلې د غوراوي سیالۍ ترسره شوې.
دغه سیالۍ چې دوې ورځې یې دوام وکړ، د دوو سني کټګوریو ځوانانو او لویانو په مختلفو وزنونو کې ترسره شوې، په پایله کې په مختلفو وزنونو کې د یاد ولایت په کچه د پهلوانۍ سیالیو لپاره ۴۰ کسیزه منتخبه لوبډله وټاکل شوه، چې په راتلونکې کې به د یاد ولایت په کچه په ملي او ولایتي سیالیو کې د نوموړي ولایت په استازولۍ سیالۍ ترسره کړي.
هېره دې نه وي چې په پای کې غوره ورزشکارانو ته د ورزشي مسوولینو له لوري مډالونه او ستاینلیکونه ورکړل شول.
