ننګرهار؛ شیرزاد ولسوالۍ کې د ٢٠ لوبډلو ترمنځ د ټېپ بال کرکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرکټ فدراسیون د استازولي له لوري د ياد ولايت د شیرزاد ولسوالۍ په طوطو سیمه کې د ٢٠ لوبډلو ترمنځ د ټېپ بال کرکټ سیالۍ د طوطو لوبډلې په اتلولي پای ته ورسېدې.
د یادو سیالیو پایلوبه د طوطو او بر اپشان همدرد لوبډلو ترمنځ ترسره شوه. د لوبې پچه بر اپشان لوبډلې وګټله او په ټاکلو لسو اورونو کې یې د شپږو لوبغاړو په له لاسه ورکولو سره خپلې سیالې لوبډلې ته د ١٥٦ منډو هدف وټاکه. طوطو لوبډلې ټاکلی هدف د خپلو اتو لوبغاړو په له لاسه ورکولو سره پوره کړ او د دوه ویکټو په توپیر یې اتلولي په خپل نوم کړه.
يادې سیالۍ له نظام څخه د ملاتړ په موخه ترسره شوې چې یوه نیمه میاشت یې دوام وکړ او په پای کې اتلې لوبډلې ته یو عراده موټر سایکل د ډالۍ په توګه ورکړل شو.
