ننگرهار؛ اليون سټار لوبډلې د ماڼو ټېپ بال کرېکټ غوره ليگ اتلولي وگټله
د ننگرهار ولايت د بدني روزنې او ورزش رياست اړوند د ټېپ بال کرېکټ فدراسیون د استازولۍ له لوري د ياد ولايت په چپرهار ولسوالۍ کې د ۶ لوبډلو ترمنځ د ماڼو ټېپ بال کرېکټ غوره ليگ چې يوه مياشت مخکې پيل شوی و د اليون سټار لوبډلې په اتلولۍ پای ورسېد.
د يادو سياليو پايلوبه د اليون سټار او ملکزي کلب لوبډلو ترمنځ وشوه، د لوبې پچه اليون سټار لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د درېيو لوبغاړو په سوځېدو سره خپلې سيالې لوبډلې ته د ۱۸۹ منډو هدف وټاکه، په ځواب کې ملکزي کلب لوبډلې د ټولو اورونو په لوبولو سره ۱۴۵ منډې وکړې او لوبه يې د ۴۴ منډو په توپير وبايلله.
