ننگرهار؛ بټي کوټ ولسوالۍ کې د ټېپ بال کرېکټ سيالۍ پای ته ورسېدې
د ننگرهار ولايت د بدني روزنې او ورزش رياست په همغږۍ د ياد ولايت په بټي کوټ ولسوالۍ کې د ۶ لوبډلو ترمنځ د مشواڼو ټېپ بال کرېکټ سيالۍ، چې شاوخوا يوه مياشت مخکې پيل شوې وې د مشواڼو سټارز لوبډلې په اتلولۍ پای ته ورسېدې.
د يادو سياليو پايلوبه د مشواڼو سټارز او مشواڼو ځوانانو لوبډلو ترمنځ ترسره شوه، د لوبې پچه مشواڼو سټارز لوبډلې وگټله او لومړی يې د توپ وهنې پرېکړه وکړه، چې په ټاکلو ۱۰ اورونو کې يې د ۶ لوبغاړو په سوځېدو سره خپلې سیالې لوبډلې ته د ۹۸ منډو هدف وټاکه، په ځواب کې مشواڼو ځوانانو لوبډلې د ټولو اورونو په لوبولو سره ۹۵ منډې وکړې او لوبه يې د ۳ منډو په توپير وبايلله.
د يادونې وړ ده، چې د دغو سياليو موخه د لوبغاړو ترمنځ يووالی رامنځته کول وو.
