ننگرهار؛ په اچين ولسوالۍ کې د ۱۶ لوبډلو ترمنځ د اچين ټېپ بال کرېکټ غوره ليگ سيالۍ پيل شوې
د ننگرهار ولايت د بدني روزنې او سپورټ رياست اړوند د شينوارو شپږگونو ولسواليو ورزشي مديريت له لوري د اچين ولسوالۍ په قوميزي لوبغالي کې د ۱۶ لوبډلو ترمنځ له اوسني نظام څخه د ملاتړ په موخه د اچين ټېپ بال کرېکټ غوره ليگ (APL) سيالۍ د شېرگړ زلمو لوبډلې په بريا پيل شوې.
د يادو سياليو لومړۍ لوبه د شېرگړ زلمو او چينو سټارز لوبډلو ترمنځ ترسره شوه، شېرگړ زلمو لوبډلې د لوبې پچې په گټلو سره په ټاکلو لسو اورونو کې سيالې لوبډلې ته د ۱۹۱ منډو هدف کېښود، چينو سټارز لوبډلې ياد هدف ترلاسه نه کړ او د ۳۶ منډو په توپير يې ماته ومنله.
د يادونې وړ ده، چې دغه سيالۍ به شاوخوا دوې اوونۍ دوام وکړي.
