هرات؛ د ورزش ادارې عمومي رئیس د فوټبال د روزونکو له B درجې کورس څخه لیدنه وکړه
د المپیک، بدني روزنې او ورزش عمومي رئیس مولوي احمد الله وثیق، ورسره مله پلاوي ورزشي مشاور ګلاب الدین خپلواک، د نشراتو رئیس او ویاند اتل مشواڼي په هرات ولایت کې د فوټبال له بي درجې کورس څخه، چې ۱۵ ورځې وړاندې پیل شوی و، لیدنه وکړه.
دغه کورس د هرات او بادغیس ولایت د فوټبال ۲۴ روزونکو ته د ۲۰ ورځو لپاره پیل شوی، چې د فوټبال د مجرب مدرس محمد طاهر روفي له خوا یې د تدریس چارې په مخ وړل کیږي.
د دې لیدنې په پیل کې د هرات ولایت د فوټبال فدراسیون رئیس ډاکټر شاه رسول احراري د ښه راغلاست وینا وکړه، نوموړي خوښي وښوده، چې د ورزش ادارې رهبري تل د ورزشکارانو همکاري کړې په ځانګړي ډول د فوټبال لاسنیوی یې کړی. ښاغلي احراري زیاته کړه، چې همدا د ورزش ادارې همکاري ده، چې د افغانستان فوټبال له جدي ننګونو سره نه دی مخ شوی.
ورپسې مولوي احمد الله وثیق خبرې وکړې، خوښي یې وښوده، چې د فوټبال فدراسیون له ورزشي کادر سره د روزنې په سیمنار کې شتون لري، همداراز ښاغلي وثیق زیاته کړه، چې اوسمهال د فوټبال په برخه کې تر A درجې پورې کورسونه په افغانستان کې دننه ترسره کیږي، چې دا پرمختګ د ستاینې وړ دی، په پای کې نوموړي یو ځل بیا ټینګار وکړ، چې د ورزش اداره د خپلو امکاناتو تر کچې د ورزش او ورزشکارانو همکاري او پرمختګ ته ژمنه ده.
