هلمند؛ د بدن ښکلا دوولسم پړاو ټاکنيزې سيالۍ پاى ته ورسېدې
د هلمند ولایت د ورزش امريت په مرسته د بدن ښکلا فدراسيون له لوري د مرکز لښکرګاه ښار په فرهنګي مرکز "سينما" کې د ٥٠ ورزشکارانو په ګډون د بدن ښکلا دوولسم پړاو ټاکنيزې سيالۍ ترسره شوې.
دغه سيالۍ چې د يوې ورځې لپاره د هلمند د بدن ښکلا فدراسيون د رئیس ننګيالي ويښ په مالي ملاتړ ترسره شوې موخه يې د هلمند بدن ښکلا منتخبې لوبډلې، ميسټر هلمند او جينر هلمند ټاکل او ورزش ته د ځوانانو هڅول دي.
په دغو سياليو کې لس ورزشکاران د هلمند د بدن ښکلا منتخبې لوبډلې ته وټاکل شول، چې عزيزالله سعيدي د ميسټر هلمند او عبدالهادي د جينر هلمند لقبونه وګټل.
په پاى کې مقام ګټونکو او غوره ورزشکارانو ته ډالۍ، کپونه، تصديق نامې او ستاينليکونه هم ورکړل شول.
