هلمند؛ موسی کلا ولسوالۍ کې د اوو لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش امریت اړوند د ټېب بال کرېکټ فدراسیون د استازولۍ له لوري د یاد ولایت په موسی کلا ولسوالۍ کې د اوو لوبډلو ترمنځ د ټېپ بال کرېکټ سیالۍ د زیارمل لوبډلې په اتلولي پای ته ورسېدې.
د یادو سیالیو پایلوبه د زیارمل او حقیار لوبډلو ترمنځ ترسره شوه. د لوبې پچه حقیار لوبډلې وګټله او لومړی یې توپ وهنه وکړه، چې په ټاکلو ۱۲ اورونو کې یې خپلې سیالې لوبډلې ته د ۱۱۰ منډو هدف وټاکه. زیارمل لوبډلې ټاکلی هدف د دوو ویکټو په زیان پوره کړ او د اتو ویکټو په توپیر یې د سیالیو اتلولي وګټله.
دا سیالۍ د سیمې د خلکو لپاره د سالمې تفرېح برابرولو په موخه ترسره شوې، چې یوه نیمه اوونۍ یې دوام وکړ.
