هلمند؛ نادعلي ولسوالۍ کې د ٢٤ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت په ناد علي ولسوالۍ کې د ٢٤ لوبډلو ترمنځ د ټېپ بال کرېکټ سیالۍ د پوپل او ورونو لوبډلې په اتلولي پای ته ورسېدې.
د یادو سیالیو پایلوبه د پوپل او ورونو او ګران اکاډمي لوبډلو ترمنځ ترسره شوه. د لوبې پچه ګران اکاډمي لوبډلې وګټله او لومړی یې توپوهنه وکړه، چې په ټاکلو لسو اورونو کې یې خپلې سیالې لوبډلې ته د ٦٣ منډو هدف وټاکه. پوپل او ورونو لوبډلې ټاکلی هدف د دوو ویکټو په زيان د لوبې په پنځم اور کې ترلاسه کړ او د اتو ویکټو په توپیر یې د دغو سیالیو اتلولي وګټله.
دا سیالۍ ورزش ته د ځوانانو د هڅولو او سالمې تفرېح برابرولو په موخه ترسره شوې، چې دوې یې دوام وکړ او اتلې لوبډلې ته یو عراده سیونټي موټر سایکل ورکړل شو.
