هلمند؛ نادعلي ولسوالۍ کې د ۲۸ لوبډلو ترمنځ د ټېپ بال کرکټ سيالۍ پای ته ورسېدې
د هلمند ولايت د بدني روزنې او ورزش امريت اړوند د ټېپ بال کرکټ فدراسيون د استازولۍ له لوري د نادعلي ولسوالۍ په مرکزي ورزشي لوبغالي کې د ۲۸ ب لوبډلو ترمنځ د ټېپ بال کرکټ سيالۍ د خپلواک لوبډلې په اتلولۍ پای ته ورسېدې.
د يادو سياليو پايلوبه د خپلواک او شاهين لوبډلو ترمنځ ترسره شوه، چې په پايله کې شاهين لوبډلې په ټاکلو ۱۲ اورونو کې سيالې لوبډلې ته د ۱۰۵ منډو هدف کېښود، خپلواک لوبډلې ياد هدف په نهم اور کې ترلاسه کړ او د دوو ويکټو په توپير يې بريا خپله کړه.
د دغو سياليو د ترسره کېدو موخه ورزش ته د ځوانانو هڅول و، چې دوې مياشتې يې دوام وکړ او په پای کې گټونکې لوبډلې د اتلولۍ جام او غوره لوبغاړو ته چمتو شوې ډالۍ ورکړل شوې.
