هلمند؛ په مرکز لښکرګاه کې د ۳۲ لوبډلو ترمنځ د ټېپ بال کرکټ سيالۍ پای ته ورسېدې
د هلمند ولايت د بدني روزنې او ورزش امريت او ټېپ بال کرکټ فدراسيون د استازولۍ په همغږۍ د ځوانانو د پرمختګ او يووالي په نوم د ۳۲ لوبډلو ترمنځ د ټېپ بال کرکټ سيالۍ پای ته ورسېدې.
يادې سيالې د مرکز لښکر ګاه په غازي محمد ايوب خان لوبغالي کې ترسره شوې، چې موخه يې د ياد ولايت د ځوانانو ترمنځ يووالی، پرمختګ او د تجربو شريکول وو.
د دغو سياليو پايلوبې ته ګربز او ګرمسېر لوبډلو لار موندلې وه، لومړی توپوهنه ګربز لوبډلې وکړه او په ټاکلو اتو اورونو کې يې سيالې لوبډلې ته ۸۹ منډې هدف کېښود، د لوبې په دويمه پاڼۍ کې ګرمسېر لوبډلې ياد هدف د يوه لوبغاړي په زيان پوره کړ او په نهو ويکټو يې اتلولي خپله کړه.
هېره دې نه وي چې په پای کې غوره لوبغاړو ته د مسوولينو له لوري چمتو شوې ډالۍ ورکړل شوې.
