هلمند؛ ګرمسیر ولسوالۍ کې د امیربلند اغا د فوټبال ناک اوټ سیالۍ د اریانا لوبډلې په اتلولۍ پای ته ورسېدې
د هلمند ولایت د فوټبال فدراسیون د استازولۍ له لوري د ۱۶ لوبډلو ترمنځ د فوټبال ناک اوټ سیالۍ، چې یوه میاشت وړاندې د یاد ولایت په ګرمسیر ولسوالۍ کې پیل شوې وې د اریانا لوبډلې په اتلولۍ پای ته ورسېدې.
د دغو سیالیو پایلوبه د اریانا او خوشحال لوبډلو ترمنځ ترسره شوه، چې په پایله کې سیالۍ په ټاکلي وخت کې ۱/۱ مساوي پای ته ورسېده، خو د اریانا لوبډلې د پنالټي ګولونو په وهلو خوشحال لوبډلې ته د ۴/۲ ګولونو په توپیر ماتې ورکړه او اتلولي یې په خپل نوم کړه.
د یادو سیالیو د ترسره کېدو موخه د ځوانانو ترمنځ یووالی او د ګرمسیر ولسوالۍ کې د فوټبال ورزش ته وده ورکول وو.
د سیالۍ په پای کې غوره لوبډلو او غوره لوبغاړو ته ډالۍ او جایزې ورکړل شوې.
