وزلوبه؛ پنجشېر لوبډلې اتو غوره لوبډلو ته لار پېدا کړه
د هېواد المپيک، بدني روزنې او ورزش عمومي رياست په همکارۍ، د وزلوبې، نيزه وهنې او سيمه ييزو لوبو ملي فدراسیون له لوري د کابل ښار په يکه توت لوبغالي کې د ۱۱ لوبډلو ترمنځ د يما پطرول افغانستان ليگ اووم پړاو سياليو په څلورمه ورځ يوه لوبه وشوه، چې د پنجشېر لوبډلې په بریا پای ته ورسېده.
د وزلوبې ليگ اووم پړاو سياليو په لسمه لوبه کې پنجشېر لوبډلې خپلې سيالې سنمگان لوبډلې ته د ۲ پر ۱ امتياز په توپير ماتې ورکړه او د اتو غوره لوبډلو پړاو ته يې لار ومونده، چې په دې سره د ياد ليگ لومړي پړاو سيالۍ هم پای ته ورسېدې.
د دغه ليگ دويم پړاو (۸ غوره لوبډلو ) سيالۍ به د کندز، بلخ، هرات، بغلان، پنجشېر، بدخشان، سرپل او تخار لوبډلو ترمنځ سبا ورځ پيل شي، چې لومړنۍ سيالي به يې سبا ۱۱ بجې د بدخشان او پنجشېر لوبډلو ترمنځ ترسره شي.
د ويلو ده، چې د يما پطرول افغانستان وزلوبې ليگ اووم پړاو سيالۍ د بهرنيو چاپندازانو په گډون د کندز، فارياب، بلخ، بدخشان، تخار، باميان، سرپل، پنجشير، سمنگان، بغلان او هرات لوبډلو ترمنځ څلور ورځې مخکې پيل شوي، چې اته ورځې به نور هم دوام ومومي.
