٢٥ ورزشکارانو د بايسکل ځغلونې ملي لوبډلې غړيتوب ترلاسه کړ
د بايسکل ځغلونې ملي لوبډلې د غوراوي سیالۍ چې دوې ورځې وړاندې د لسو ولايتونو د ٥٠ ورزشکارانو ترمنځ د کابل خوست لويي لارې ترمنځ پيل شوې وې پاى ته ورسېدې.
په دغو سياليو کې د کابل، غزني، لوګر بادغیس، تخار، بلخ، خوست، زابل، کاپيسا او کندهار ولایتونو ورزشکارانو ګډون کړی و، چې د المپيک ملي کمېټې له انګړ څخه يې تر خوست ولايت پورې ٢٣٠ کيلومتره مزل وکړ.
د بايسکل ځغلونې ورزشکارانو د کابل، لوګر، پکتیا او خوست ولایتونو لارې څخه د ٢٣٠ کيلومتره واټن وهلو وروسته د خوست د بدني روزنې او ورزش امريت او د ورزش مينه والو له تود هرکلي سره مخ شول.
د خوست د بدني روزنې او ورزش امر عطاالله کډوال د دې سياليو د پاى په مراسمو کې ګډون وکړ او د يادو سياليو ګډونوال ورزشکاران يې تشویق کړل.
ښاغلي کډوال د خپلو خبرو په جريان کې ګډون کوونکو ورزشکارانو ته وویل؛ د خوښۍ ځاى دى چې خوست د بايسکل ځغلونې ملي لوبډلې د غوراوي سياليو کوربه دى، دا د دې سبب کېږي ترڅو ځوانان له ورزش سره مينه پيدا کړي.
د دغو سياليو په پاى کې د لوبڅارانو د امتياز له مخې کابل لومړى خوست دويم او کابل درېيم مقام ترلاسه کړ چې د کپونو، مډالونو او تقديرنامو په ورکولو سره و هڅول شول.
