پروان؛ سرخ پارسا ولسوالۍ کې د ۹ لوبډلو ترمنځ د فوټبال سيالۍ پای ته ورسېدې
د پروان ولایت د بدني روزنې او ورزش امريت اړوند د فوټبال ملي فدراسیون د استازولۍ له لوري د ياد ولايت په سرخ پارسا ولسوالۍ کې د ۹ لوبډلو ترمنځ د فوټبال سيالۍ، چې دوې اوونۍ مخکې پیل شوې وې د اتحاد شيخه ترکمن لوبډلې په اتلولۍ پای ته ورسېدې.
د دغو سياليو په پایله کې اتحاد شيخه ترکمن لوبډلې د زياتو امتيازونو په ترلاسه کولو سره لومړی او دلرستان لولنچ لوبډلې بیا دويم مقام خپل کړ.
د يادو سياليو موخه د فوټبال لوبو ته وده ورکول او ورزش ته د ځوانانو هڅول و، د سياليو په پای کې غوره لوبډلې او لوبغاړو ته چمتو شوې ډالۍ ورکړل شوې.
