پروان؛ مرکز کې د شپږو لوبډلو ترمنځ د والیبال سیالۍ د عقابان پروان لوبډلې په اتلولۍ پای ته ورسېدې
د پروان ولایت د بدني روزنې او ورزش امریت اړوند د والیبال فدراسیون استازولۍ له لوري د یاد ولایت مرکز چاریکار ښار په ورزشي جمنازیوم کې د پروان پوهنتون د محصلینو د شپږو لوبډلو ترمنځ د ګل ارغوان جام په نوم د والیبال سیالۍ د عقابان پروان لوبډلې په اتلولۍ پای ته ورسېدې.
د دغو سیالیو په پایلوبه کې د عقابان پروان لوبډلې خپلې سیالې فتح خیبر لوبډلې ته د ۳/۱ میدانونو په توپير ماتې ورکړه او اتلولي یې خپله کړه.
د یادو سیالیو موخه ورزش ته د ځوانانو هڅوول او د پوهنتون محصیلینو ترمنځ یووالی رامنځته کول و.
د سیالیو په پای کې د ورزش مسوولینو له لوري غوره لوبډلې ته د اتلولۍ جام او غوره لوبغاړو ته چمتو شوې جایزې ورکړل شوې.
