پروان؛ وحدت خواجه سياران لوبډلې د فوتسال اختريز سياليو اتلولي وګټله
د فوتسال اختريز جام سیالۍ چې د پروان ولايت د ورزش امريت په مرسته د دې ولايت د فوټبال فدراسیون له لوري د چنګاښ په ١٣مه نېټه د چاريکار ښار په صادقي لوبغالي کې د څلور لوبډلو ترمنځ پيل شوې وې، تېره ورځ د وحدت خواجه سياران لوبډلې په اتلولي پاى ته ورسېدې.
په دغو سياليو کې د وحدت خواجه سياران، ياران صادقي، پروان يونايټډ او ارمان ميهن لوبډلو ګډون درلود.
د يادو سياليو په پايلوبه کې د وحدت جواجه سياران لوبډلې ٤-٣ ګولونو په توپیر ياران صادقي لوبډلې ته ماتې ورکړه او د دې سياليو اتلولي يې خپله کړه، همداراز ياران صادقي لوبډلې دويم مقام تر لاسه کړ.
په پاى کې د پروان د ورزش امريت او د دې ولايت د فوټبال فدراسیون مسوولينو له لوري اتلې لوبډلې او غوره ورزشکارانو ته کپ، مډالونه، او لوح سپاس هم ډالۍ کړل.
